கூகிளும் அதன் வரலாற்றுப் பாதையும்

இன்றைய இணைய உலகிள் கூகிள் எமக்குத் தரும் சேவைகளோ ஏராளம் ஏராளம்.

எனவே இந்த கூகிள் நிறுவனத்தையும் அதன் வரலாற்றையும் ஒரு சிறிய பார்வையிடுவோம்.

கலிபோர்னியா (Stanford University) இஸ்டான்போர்ட் பல்கலைக்கழகத்தில் சேர்ஜி பிரின் (Sergy Brin) லெரி பேஜ் (Larry Page) எனும் இரண்டு கலாநிதிப் பட்டப்படிப்பு மாணவர்கள் தமக்கு வழங்கப்பட்ட ஒரு ஆராய்ச்சிக்காக தொடங்கிய ஒரு முயற்சியே கூகிள் எனும் தேடு இயந்திரம் தோன்றுவதற்கு வழிவகுத்தது எனலாம்.

இது இஸ்டான்போர்ட் பல்கலைக்கழகத்தின் ஆராச்சிக்கான ஒரு விடயமாக மட்டும் இருந்தப்போதிலும், சேர்ஜி பிரின் மற்றும் லெரி பேஜ் இருவரும் இந்த ஆய்வை ஒரு தேடு இயந்திரத்திற்கான ஆய்வாக முன்னெடுத்தனர். தேடப்ப்படும் ஒரு சொல் அல்லது விடயம் எந்தெந்த இணைய பக்கங்களிலிருந்தாலும் அதை அலசி ஆராய்ந்து நமது தேடலுக்குறிய பக்கங்களை தேடுபதிலாக பட்டியலிடும் தொழில் நுட்ப முறையைச் சிறந்ததாக இவர்கள் கருதினர். இது இவர்களின் இசுடான்போர்ட் பல்கலைக்கழகத்தின் தமது பட்டப்படிப்பிற்கான ஆராய்ச்சியாக மட்டும் இருந்தப் போதிலும், ஆராய்ச்சியின் பயனாக இஸ்டான் போர்ட் பல்கலைக்கழகத்தின் பக்கங்களை தேடுவதற்கான ஒரு தேடு இயந்திரமாக "google.standford.edu" எனும் (டொமைன்) பெயரில் பாவனைக்கு உள்ளானது.

அதன் பின்பு இவ்விருவரும் 1998 ஓகஸ்ட் மாதம் தமது நண்பர் ஒருவரது வீட்டு வாகன நிறுத்தகத்தில் அதிகாரபூர்வமாக கூகிள் நிறுவனத்தை வர்த்தக நோக்குடன் ஆரம்பித்தனர். அதே மாதம் 1998 ஆகஸ்ட் 15 ம் நாள் இந்நிறுவனத்திற்கு http://www.google.com/ எனும் பெயரும் பதிவுசெய்யப்பட்டது. இவர்களின் இப்புதிய நிறுவனத்தின் முதலீட்டிற்காகப் பலரை அணுகினர்.

இறுதியில் ஒருவாறு 1.1 மில்லியன் டொலர்களை தேடிக்கொண்டு கூகிளின் செவையை தொடர்ந்ததனர்.

வாகன நிறுத்தகத்திலிருந்த இந்நிறுவனம் 1999 மார்ச் மாதம் Silicon Valley எனும் இடத்திற்கு இடமாற்றப்பட்டது. இந்நிறுவனத்தின் அபார வளர்ச்சியால் ஏற்பட்ட இடப்பற்றாக்குறைவு; இந்நிறுவனத்தை வேறு ஒரு பெரிய கட்டிடத்திற்கு இடமாற்றம் செய்ய வேண்டிய தேவையை ஏற்படுத்தியது. அதனால் 2003 ம் ஆண்டு வேறு ஒரு கட்டிடத்தை வாடகைக்குப் பெற்றனர். அந்த கட்டிடத்திற்கு Googleplex என்று பெயரிட்டனர். 2006 ம் ஆண்டு அதேக் கட்டிடத்தை 319 மில்லியன் டொலர்களுக்கு கூகிள் நிறுவனம் விலைக்கு வாங்கிக்கொண்டது. கூகிளின் தேடு இயந்திர தொழில் நுட்பம் 2001 செப்டம்பரில் காப்புரிமை செய்யப்பட்டது. அத்துடன் இஸ்டான்போர்ட் பல்கலைக்கழகத்தில் அதிகாரபூர்வ காப்புரிமையிலும் பட்டியலிடப்பட்டது. 2004 ஆகஸ்ட் 19 ம் நாள் கூகிள் நிறுவனத்தை ஒரு பொது நிறுவனமாக பதிவு செய்துக்கொள்ளப்பட்டது. கூகிள் தமது தேடு இயந்திரத்தினூடாக புதியப் புதிய மாற்றங்களைச் செய்து இணைய பாவனையாளர்களை வெகுவாக கவரத்தொடங்கியது. 2000 ம் ஆண்டிலிருந்து தேடு இயந்திரத்தில் தேடப்படும் சொல் அல்லது விடயம் தொடர்பானத் தேடுபதில்களுடன் விளம்பரங்களையும் கூகிள் நிறுவனம் காட்சிப்படுத்தி அதனூடாகவும் வருமானத்தை ஈட்டத் தொடங்கியது. 2007 செப்டம்பர் 30 ம் நாள் கணக்கெடுப்பின் படி இந்த நிறுவனத்தின் முழுநேரப் பணியாளர்கள் 15, 916 இருக்கின்றனர். NASDAQ இல் பட்டியலிடப்பட்டப் பொது நிறுவனங்களில் கூகிள் நிறுவனமே பெரியதாகும். லெரி பேஜ் , சேர்ஜி பிரின் ஆகிய இவர்களால் உருவாக்கப்பட்ட கூகிள் NASDAQ பங்குச்சந்தையில் 2004 ஓகஸ்ட் 19 ம் நாள் 1.67 பில்லியன் டொலர்களுக்கு பங்குகள் விற்பனையாகின. அத்துடன் 23 பில்லியன் டொலர்களுக்கும் மேலாக கூகிள் நிறுவனம் மதிப்பாகியிருந்ததும் குறிப்பிடத்தக்கது. இன்று பல நூற்றுக்கணக்கான தேடு இயந்திரங்கள் தோன்றியுள்ளப்போதும் 87% வீதமானோர் கூகிள் தேடு இயந்திரத்தையே பாவிக்கின்றனர் எனக் கணிப்புகள் கூறுகின்றன.

இன்று Google எனும் பெயர் பிரசித்தி பெற்று இருந்தாலும்; "Googol" எனும் பெயரே எழுத்துப்பிழையாக "Google" என தட்டச்சு செய்யப்பட்டு விட்டதால், "Google" எனும் பெயரே பதிவுச்செய்யப்பட்டு தற்போதும் நிலைத்து நிற்கிறது.Googol என்றால் 1 ன்றுடன் 100 பூச்சியங்களை இணைத்தால் வரும் எண்ணிக்கையை குறிக்கும் தொகைக்கான சொல்லாகும். எப்படியோ Googol எனும் வார்த்தை Google என்று தவறாக தட்டச்சப்பட்டது என்றாலும், "Google" எனும் இவ்வார்த்தை இன்று உலகளவில் எல்லா மொழிகளிலுமே பயன்படும் ஒரு சொல்லாக நிலைத்துவிட்டது.

இச்சொல்லை 2006 ல் ஒக்ஸ்போர்ட் அகராதியில் "இணையத்தில் தகவல்களை தேடுவதற்கான ஒரு தொழில் நுட்பச் சொல்" என்று இணைக்கப்பட்டுள்ளது.

எப்படியோ இன்று இணையத்தில் நூற்றுக்கணக்கான தேடு இயந்திரங்கள் தோன்றியுள்ளப் போதும். எல்லோரது மனதிலும் நின்று நிலைத்து விட்ட ஒரு தேடு இயந்திரம் “கூகிள்” ஆகும். ஒரு நாளைக்கு பல பில்லியன் வார்த்தைகளைக் கண்ணிமைக்கும் நேரத்தில் தேடித்தரும் தேடு இயந்திரமாக எல்லோர் மனதிலும் பதிந்து விட்டது.

அத்துடன் நின்றுவிடாது; புதிய பொருட்களின் வடிவமைப்பு, மற்றைய நிறுவனங்களை கொள்முதல் செய்தல், பங்குதாரர்கள், விளம்பரங்கள், வியாபார யுக்திகள் என இணையத்தில் பல்துறைகளிலும் புகுந்து விளையாடுகிறது.